सल्यानकोट स्वास्थ्य चौकीमा एच. आइ. भि. एड्स सम्बन्धी जनचेतनामूलक कार्यक्रम सम्पन्न

धादिङ जेष्ठ २३
सल्यानकोट स्वास्थ्य चौकी त्रिपुरा सुन्दरी गाउँ पालिका वडा नं. ४ मा रहेको सल्यानकोट स्वास्थ्य चौकीमा आज एच. आइ. भि एड्स सम्बन्धी जनचेतनामूलक कार्यक्रम सम्पन्न भएको छ । एच. आइ. भि. सङ्क्रमित हुने दर घटाउने, एच. आइ. भि. सङ्क्रमित व्यक्तिहरुप्रतिको सामाजिक विभेद कम गराउने, उनीहरुलाई समाजमा सम्मानजनक जीवन जिउन सहजीकरण गर्ने उद्देश्यका साथ कार्यक्रमको आयोजना गरिएको त्रिपुरा सुन्दरी गाउँ पालिकाका स्वास्थ्य संयोजक याम बहादुर श्रेष्ठले बताउनु भयो । एच आइ भि कसरी सर्छ ? सर्नबाट कसरी बच्न सकिन्छ भन्ने बारेमा कार्यक्रममा छलफल भएको हो । त्रिपुरा सुन्दरी गाउँ पालिका वडा नं. ४ का वडा अध्यक्ष कपिलदेव सिंखडाले उद्घाटन गर्नु भएको कार्यक्रममा उक्त वडाका सम्पूर्ण जनप्रतिनिधि, विद्यालयका शिक्षक, महिला स्वास्थ्य स्वयमसेविका, एच. आइ. भि. सङ्क्रमित व्यक्तिहरु, संघ संस्थाका प्रमुख एवं प्रतिनिधि र स्वास्थ्यकर्मीहरु लगायत ४० जनाको सहभागिता रहेको थियो । कार्यक्रम उद्घाटन गर्दै वडा अध्यक्ष सिंखडाले त्रिपुरा सुन्दरी गाउँ पालिकाको स्वास्थ्य शाखाले विगतदखि नै राम्रो काम गर्दै आएको र यस्ता खाले जनचेतनामूलक कार्यक्रम निरन्तर गरिराख्नु पर्ने बताउनु भयो । हाल सल्यानकोटमा मात्रै करिब १० जनाको हाराहारीमा एच. आइ. भि. सङ्क्रमित रहेका छन् । कार्यक्रमको आयोजना त्रिपुरा सुन्दरी गाउँ पालिकाको स्वास्थ्य शाखाले गरेको हो ।