जातीय छुवाछुत तथा सामाजिक भेदभाव उन्मुलन राष्ट्रिय दिवस धादिङमा पनि मनाइयो

धादिङ जेष्ठ २१
“सम्पूर्ण दलित तथा उत्पीडित समुदायहरु एक हौँ” भन्ने मूल नाराको साथ आज धादिङबेशीमा जातीय छुवाछुत तथा सामाजिक भेदभाव उन्मुलन राष्ट्रिय दिवस मनाइएको छ । संयुक्त राजनीतिक दलित सर्घष समिति धादिङद्धारा आयोजित कार्यक्रममा प्रदेश सांसद राम कुमार अधिकारीको प्रमुख आतिथ्यता, जिल्ला समन्वय समिति धादिङका संयोजक जगन्नाथ नेपाल, सह संयोजक विन्दा बराम नेपालीको विशेष आतिथ्यता, नेपाल राष्ट्रिय दलित मुक्ति मोर्चाका केन्द्रिय सदस्य दिपक वि.क, दलित नेता कुलमान वि.क, अमृत वि.क लगायतको आतिथ्यता रहेको थियो ।

प्रमुख अतिथि अधिकारीले संविधानमा दलित अधिकारका कुराहरु प्रशस्त लेखिएता पनि कार्यान्वयनमा अझै समस्या रहेको तथा वजेट विनियोजन गर्दा दलितहरुका लागि आवश्यक बजेट विनियोजन गर्नुपर्ने र त्यसका लागि आफूले आवश्यक भूमिका निर्वाह गर्ने प्रतिवद्धता जनाउनु भयो । यस्तै जिल्ला समन्वय समिति धादिङका संयोजक जगन्नाथ नेपालले अझै पनि पानी चल्ने र नचल्ने विच छुवाछुत जारी रहेको तथा विभिन्न समयमा बजेटहरु आए पनि गरिव, निमुखा दलितहरुमा पुग्न नसकेको कुरा बताउनुभयो । यस्तै दलित समुदायमा पर्याप्त बजेट नआउनुको कारण दलित समुदायको आवाज शसक्त नभएको र कानुनमा जातीय छुवाछुत मुक्त राष्ट्र घोषणा भएता पनि व्यवहारमा लागु हुन नसकेको बताउनु भयो ।

यस्तै दलित अगुवा दिपक वि.कले हरेक युद्ध आन्दोलनमा दलितहरुको सक्रिय सहभागिताका साथै वलिदानी समेत रहेकाले अब हेपिएर बस्न नहुने बताउनु भयो । साथै संविधानले धेरै अधिकार दिएता पनि कार्यान्वयनका लागि दलित समुदाय नै अग्रसर हुनुपर्ने बताउनुभयो । अर्का दलित अगुवा गोपाल वि.कले स्थानीय सरकार भएपछि पनि दलितहरुलाई कुनै खालको कार्यक्रम नभएको र दलित विद्यार्थीहरुको नाममा आउने गरेको छात्रवृद्धि दलितले नपाएको तथा मुलुक चलाउने अवसर दलितहरुलाई पनि आउनुपर्ने बताउनुभयो । कार्यक्रम संयुक्त राजनीतिक दलित सर्घष समिति धादिङका अध्यक्ष सानो वावु वराइलीको सभापतित्वमा सम्पन्न भएको थियो ।