प्रयोगात्मक शिक्षा र त्रिकोणात्मक सम्बन्धले धादिङ बोर्डिङ अझै अब्बल बनेको छ । उपमेयर : भण्डारी

धादिङ जेष्ठ ८
अपिल कोइराला
धादिङ आवासीय माध्यमिक विद्यालय नीलकण्ठ ३, धादिङले बुधबार वृहत अभिभावक अन्तरकृया तथा परिचयात्मक कार्यक्रम सम्पन्न गरेको छ । नीलकण्ठ नगरपालिका धादिङका उपमेयर एवं नगर शिक्षा समितिका उप संयोजक मनराज भण्डारीको प्रमुख आतिथ्यता र विद्यालयका प्रधानाध्यापक हरि लम्सालको सभापतित्वमा सञ्चालित कार्यक्रममा कक्षा ५, ६ र ७ का विद्यार्थीहरुका करिब १०० जना अभिभावकहरुको उपस्थिति रहेको थियो । अभिभावक भेलामा उपमेयर भण्डारीले विभिन्न किसिमका प्रोजेक्ट वर्क, प्रयोगात्मक शिक्षा तथा समय समयमा हुने अभिभावक अन्तरकृयाले धादिङ आवासीय माध्यमिक विद्यालय अझै अब्बल बनेको कुरा प्रष्ट्याउनु भयो । घर नै विद्यार्थीको पहिलो पाठशाला र अभिभावक नै पहिलो शिक्षक रहेको कुरा बताउँदै विद्यालयले नगरस्तरीय परीक्षा र प्रवेशिका तथा एस.इ.इ. परीक्षामा समेत उत्कृष्ट नतिजा ल्याउन सफल भएकोमा खुसी व्यक्त गर्दै विद्यालय परिवार, विद्यार्थीहरु र अभिभावकज्युहरुलाई अझै हौसला प्रदान गर्दै निरन्तर विद्यालय आउन सुझाव समेत दिनुभयो ।

विद्यालयका प्रधानाध्यापक हरि लम्सालले विद्यालयले विद्यार्थीहको आवश्यकता,चाहना र मागलाई मध्यनजर गर्दै पौडी, नृत्य, सङ्गीत, भाषा, गायन, भाषण, विज्ञान र प्रविधि, हस्तकलासँग सम्बन्धित कक्षाहरु सञ्चालन गर्दै आएको र आगामी दिनहरुमा यसको निरन्तरताका साथै अभिभावक अभिमूखीकरण कार्यक्रम, विभिन्न मनोविज्ञहरु समेत उपलब्ध गराइ अभिभावक शिक्षा र विद्यार्थीहरुलाई नैतिक शिक्षा समेत सञ्चालन गर्ने कुरामा जोड दिनुभयो ।