स्नातक तह प्रथम वर्षको परीक्षामा नीलकण्ठ क्याम्पस धादिङकी विवेचना सिलवाल नेपाल प्रथम

धादिङ २४ आषाढ
धादिङको नीलकण्ठ बहूमुखी क्याम्पसकी विद्यार्थी विवेचना सिलवाल त्रिभुवन विश्वविद्यालयद्धारा गत भाद्रमा लिइएको स्नातक तह प्रथम वर्षको शिक्षाशास्त्र सङ्कायको परीक्षामा नेपाल प्रथम भएकी छिन् । शिक्षाशास्त्र संकाय अन्तरगत अङ्ग्रेजी विषय अध्ययनरत सिलवाल ४ सय २५ अङ्क तथा ७०.८३ प्रतिशत सहित नेपाल प्रथम भएकी हुन् । सोही तहमा अध्ययनरत नीलकण्ठ बहूमुखी क्याम्पसकै हिरालक्ष्मी श्रेष्ठ कुल ४ सय ९ अङ्क तथा ६८.१६ प्रतिशत सहित नेपाल तृतीय भएकी छन् । नीलकण्ठ बहूमुखी क्याम्पसबाट नेपाल प्रथम भएको यो पहिलो पटक भएको क्याम्पस प्रमुख नवराज शर्माले बताउनु भयो । नीलकण्ठ बहूमुखी क्याम्पसले हालसालै मात्र QAA प्रमाणपत्र प्राप्त गरेको छ । नीलकण्ठ क्याम्पसमा स्नातक तहमा शिक्षाशास्त्र, व्यवस्थापन र मानविकी तथा स्नातकोत्तर तहमा शिक्षाशास्त्र र व्यवस्थापन सङ्कायको पठनपाठन भइरहेको छ । नीलकण्ठ बहूमुखी क्याम्पस धादिङकै पहिलो सामुदायिक क्याम्पस हो ।