आधुनिक तथा विज्ञान प्रविधिमैत्री शिक्षालाई जोड दिनुपर्छ पूर्व प्रधानमन्त्री देउवा

धादिङ २७ बैशाख
भवन निर्माणले मात्र शैक्षिक गुणस्तर नसुध्रिने भएकाले विद्यार्थीहरुलाई उचित शिक्षाका साथै विज्ञान र प्रविधिमैत्री आधुनिक शिक्षा प्रदान गर्नुपर्ने पूर्व प्रधानमन्त्री एवं नेपाली काङग्रेसका सभापति सेर बहादुर देउवाल बताउनु भएको छ । धादिङ जिल्लाकै पहिलो नमूना विद्यालय नीलकण्ठ माध्यमिक विद्यालयको नवनिर्मित ३६ कोठे भवन उद्घघाटन र हस्तान्तरण गर्न आएका देउवाले गुणस्तरीय शिक्षा आजको आवश्यकता भएकाले शिक्षा महत्वपूर्ण रहेको बताउनुभयो ।

हाल केही सिमित विद्यालयहरुले मात्रै प्राविधिक शिक्षा दिन सुरु गरेकाले भविष्यमा सहज रुपमा रोजगारी पाउन र समृद्ध नेपाल निर्माण गर्नको लागि शहर बजारका विद्यालयहरुमा मात्र नभइ विकट दुर दराजका विद्यालयहरुमा प्राविधिक शिक्षाको सुरुवात गर्नुपर्ने कुरामा जोड दिनुभयो । विद्यालय व्यवस्थापन समितिका अध्यक्ष वद्रि प्रसाद दाहालको अध्यक्षतामा सम्पन्न उक्त कार्यक्रममा पूर्व प्रधानमन्त्री सेरबहादुर देउवाको प्रमुख आतित्थ्यता रहेको थियो ।

यस्तै प्रदेश सांसद राजाराम कार्की, प्रमुख जिल्ला अधिकारी भागिरथ पाण्डे, नीलकण्ठ नगरपालिकाका मेयर भिम ढुङ्गाना, पुर्व सांसद रामनाथ अधिकारीको बिशेष आतित्थ्यता रहेको थियो । विनाशकारी भूकम्पपछि क्षति पुगेको विद्यालयमा गरिवी निवारणको लागि जापान सरकारको अनुदान र एसियन विकास बैङ्कको प्रशासनिक सहयोगमा राष्ट्रिय पुनःनिर्माण प्राधिकरण केन्द्रिय कार्यन्वयन इकाइ (शिक्षा) मार्फत ८ करोड ८० लाख ७१ हजार ७ सय १८ लागतमा ३६ कोठे ३ वटा ब्लक, एउटा खाजा घर, एउटा छात्रावास र ३ वटा सौचालय निर्माण सम्पन्न भएको हो । नीलकण्ठ माद्यमिक विद्यालयमा हाल २ हजार १ सय ८४ विद्यार्थीहरुले अध्ययन गर्दै आइरहेका छन् भने प्राविधिक विषयतर्फ इन्जिनियरिङ, विज्ञान लगायतका विषयहरुमा अध्यापन भइ रहेको छ ।