ज्वालामूखी–४,धादिङमा रहेको भूकम्प विस्थापिहरुको नमूना बस्तीमा खाद्यान्न अभाव,गाउँपालिका भन्छ, आवश्यक छैन

धदिङ ११ बैशाख
विश्वभर महांमारीको रुपमा फैलदै गएको कोरोना भाइरस(कोभिड १९)लाई रोकथाम र नियन्त्रण गर्नका लागि सरकारले जारी गरेको लकडाउनका कारण धादिङको ज्वालामुखी गाउँपालिका वडा नं. ४ मा रहेको नमूना बस्तीमा खाद्यान्न अभाव भएको छ । २०७२ सालको भूकम्पका कारण विस्थापित भएको साविकको लापा गाविसको कपुर गाउँ र नेबेरका ५५ घर धुरी बस्दै आएको उक्त नमूना बस्तीमा खाद्यान्न अभाव भएको छ । समाजसेवी दिनेश तामाङको अगुवाइमा ५५ परिवारलाई पक्की ४ कोठे घर निर्माण गरेपश्चात उक्त नमूना बस्तीमा बसोबास गर्दै आएका करिब २५ घर परिवारलाई खाद्यान्न समस्या परेको हो । घर बाहेक आफ्नो खेती गर्ते जग्गा जमिन नभएपछि दैनिक ज्याला मजदुरी गर्दै आएका उनीहरु लकडाउन जारी भएसँगै गरिराखेको काम समेत ठप्प भएपछि थप समस्यामा परेका छन् । २५ घर परिवारका करिब ७७ जनालाई तत्काल राहतको आवश्यका रहेकाले वडा अध्यक्ष, गाउँपालिका अध्यक्षसँग राहतको कुरा गर्दा तपाईँहरुको घर छ हामी राहत दिन सक्दैनौ तपाईँहरुलाई राहतको आवश्यकत छैन भनेको बताउँछन् । पीडित पूर्ण बहादुर तामाङ । “हामीले दैनिक ज्याला मजदुरी गरेर परिवार पाल्दै आएका छौँ । लकडाउनका कारण गाउँमा कुनै पनि काम छैन । भए पनि गर्ने अवस्था छैन । गाउँपालिका अध्यक्ष नै २/३ जनाको समूह बनाएर लुकिलुकि काम गर्नुस् भनेर भन्नुहुन्छ हामी कसरी काम गर्ने ? काम गर्ने वातावरण छैन । हामीलाई तत्काल राहतको आवश्यकता छ ।” भन्नुहुन्छ । मन्जुमाया तामाङ ।

“श्रीमान् बितेकाले ज्याला मजदुरी गरेर आमाछोराको पेट पाल्दै आएकी थिए । अहिले त्यो पनि ठप्प भयो । खानेकुराकै समस्याले मरिएला जस्तो छ ।” भन्ने गुनासो गर्नुहुन्छ । कविता तामाङ । यस्तै २ वर्ष, ७ वर्ष र १० वर्षको बच्चा श्रीमान् श्रीमती गरी ५ जनाको परिवारलाई श्रीमान्ले दैनिक ज्याला मजदुरी गरेर पाल्दै आउनुभएको थियो लकडाउनका कारण त्यो सबै रोकिएपछि धेरै नै कष्ठकर जीवन यापन गर्न बाध्य भएको बताउनु हुन्छ, परिमाया तामाङ ।

समस्यामा परेका मजदुर तथा विपन्न परिवारलाई राहत व्यवस्थापनको बारेमा हामीले कुरा गर्दा वडा नं. ४ का अध्यक्ष कृष्ण बहादुर गुरुङले गाउँपालिकाले हालसम्म कसैलाई पनि राहत वितरण नगरेकाले उहाँहरुको तथ्याङ्क सङ्कलन गरेर मन्त्रालय पठाइएको बताए । यस्तै गाउँपालिकाकी उपाध्यक्ष जानुका सिंखडासँग बुझ्दा “उहाँहरुको घर छ, राहत पालिका बाहिरका मजदुरहरुलाई दिने हो उहाँहरुलाई दिन सकिदैन, उहाँहरु अहिले पनि मजाले काम गरिरहनुभएको छ । त्यसैले उहाँहरुलाई राहतको आवश्यकता पर्दैन तैपनि के रैछ अवस्था म बुझ्छु ।” भन्नु भयो । यस्तै गाउँपालिका अध्यक्ष विनोद तिमल्सिनाले समेत गाउँपालिकामा राहत वितरणको कुनै आवश्यकता नभएकाले हाल राहतको कुनै योजना नरहेको बताउनु भयो ।