त्रिपुरा सुन्दरी गाउँपालिका ७ लाई खाद्यान्न तथा स्वास्थ्य सामग्री सहयोग

प्रशान्त ढउन्या
धादिङ २६ चैत्र
धादिङको त्रिपुरासुन्दरी गाउँपालिका वडा नम्बर ७ स्थित त्रिपुरेश्वर खहरेमा विपन्न घर परिवार तथा भारत लगायत अन्य जिल्लाबाट आएका कामदारहरुलाई पहिलो चरणको राहत वितरण कार्य बुधबार सम्पन्न गरिएको छ । त्रिपुरासुन्दरी गाउँपालिका वडा नम्बर ७ मा दैनिक ज्यालामजदुरी गरी जीविकोपार्जन गरिरहेका २२ घर धुरीलाई त्रिपुरासुन्दरी गाउँपालिका खहरेका स्थानीय व्यवसायी बासु एण्ड विशाल इन्टरप्राइजेज सुकौराले राहत वितरण गरेको प्रोपाइटर कृष्ण प्रसाद तिमल्सिनाले जानकारी दिनु भयो । दैनिक ज्यालामजदुरी गरी आफ्नो घर परिवार पालिरहेका परिवारलाई केही राहत स्वरुप सहयोग होस भनी राहत वितरण गरिएको हो । विश्वव्यापी रुपमा फैलिएको कोरोना भाइरस (कोभिड १९)का कारण गरिएको लकडाउनका अबस्थामा नागरिकहरुमा भोकमरीको तथा खाद्यन्न जस्ता समस्याबाट वञ्चित नहोस भनी आफूले सहयोग गरेको तिमल्सीनाले बताउनु भयो । राहत वितरण कार्य त्रिपुरासुन्दरी गाउँपालिका वडा नम्बर ७ का वडा अध्यक्ष देवराज धरेल तथा सल्यानकोट प्रहरी चौकी प्रमुख दिपक पुडासैनीको रोवहरमा गरिएको थियो । यसै गरी सोही वडा निवासी पर्यटन व्यवसायी धु्रव अधिकारीले त्रिपुरासुन्दरी गाउँपालिका वडा नम्बर ७ भित्र रहेका सबै सघ संस्थाहरुलाई पीपीइ सेट, सेनिटाईजर र माक्स सहयोग गर्नु भएको छ । उक्त स्वास्थ्य सामग्री प्रहरी चौकी र स्वास्थ्यसंस्थाहरुलाई वितरण गरिएको वडा अध्यक्ष देवराज धरेलले जानकारी दिनु भयो ।