सहकारीहरुको एकिकरण गर्ने अभियान अन्तिम चरणमा :अध्यक्ष पाठक

१४ फाल्गुन २०७६, बुधबार
देश भरका सबै सहकारीहरुको एकिकरण गर्ने अभियान अन्तिम चरणमा पुगेको नेपाल कृषि सहकारी केन्द्रीय संघ लिमिटेड काठमाण्डौंका अध्यक्ष खेमबहादुर पाठकले बताउनु भएको छ । किसानहरुले उत्पादन गरेको बस्तुहरुको विक्री वितरणको जिम्मा यस संघले लिनु पर्ने पाठकले बताउनु भयो । बुधबार साना किसान कृषि सहकारी संघ लिमिटेड धादिङको १९ औं वार्षिक साधारण सभामा बोल्दै पाठकले सो कुरा बताउनु भएको हो । नेपाल भरीका वचत ऋण सहकारीहरुमा देखिएको समस्याले गर्दा अन्य सबै सहकारीहरुको समेत बदनाम भएको बताउदै पाठकले सरकारले लागु गरेको सहकारी ऐन र नीति नियम अनुसार अगाडि बढ्नु पर्नेमा जोड दिनु भयो ।गैर सरकारी संस्था वागमती प्रदेशका अध्यक्ष दामोदर अर्यालले साना किसान सहकारी संघले अन्य सहकारीहरुले उत्पादन गरेको बस्तुहरुको विक्री वितरणको लागि बजारीकरणका व्यवस्था गरिदिनु पर्ने बताउँनु हुँदै नेपाल सरकारले किसानहरुको लागि दिएको अनुदान वास्तविक किसानहरुको हातमा नपुगेको बताउनु भयो । जिल्लाको आर्थिक स्तरमा वृद्धि गर्ने एक मात्र माध्यम भनेको सहकारी भएकाले सहकारीहरुले बिमा कार्यक्रमहरु सञ्चालन गर्न आवश्यक रहेको अर्यालले बताउनु भयो । धादिङ जिल्लामा ५ करोड भन्दा माथि कारोवार गर्ने २८ वटा सहकारीहरुमा यस संघ आवद्ध १९ वटा संस्थाले ५ करोड बढी कारोवार गरेका छन् भने २२ वटा संस्थाले १ करोड देखि ५ करोड सम्म आर्थिक कारोवार गरिरहेका छन् । यस सहकारीहरुको शेयर रकम रु २३ करोड भन्दा माथि रहेको छ भने आन्तरिक पूँजी स्रोत तर्फ १ अर्ब भन्दा माथि रहेको छ, भने संस्थाको आफ्नो मात्र कुल शेयर पूँजी २ करोड ६० लाख ९ सय ९ रुपैंया रहेको छ ।साना किसाान कृषि सहकारी संघ लिमिटेड धादिङका उपाध्यक्ष फणिकान्त छत्कुलीको अध्यक्षता रहेको कार्यक्रममा नेपाल कृषि सहकारी केन्द्रीय संघ लिमिटेड काठमाण्डौंका अध्यक्ष खेमबहादुर पाठकको प्रमुख आतिथ्यता रहेको थियो । कार्यक्रममा जिल्ला समन्वय समिति धादिङका सदस्य कृष्ण अर्यालय, गैर सरकारी संस्था वागमती प्रदेशका अध्यक्ष दामोदर अर्याल, विभिन्न संघ संस्थाका प्रमुख तथा प्रतिनिधिहरु, विभिन्न सहकारी संस्थाका प्रमुख तथा प्रतिनिधिहरु, साना किसान कृषि सहकारी संघ लिमिटेड धादिङका शेयर सदस्यहरुको सहभागिता रहेको थियो । कार्यक्रममा साना किसान कृषि सहकारी संघ लिमिटेड धादिङका उपाध्यक्ष फणिकान्त छत्कुलीले अध्यक्षको वार्षिक प्रतिवेदन र संस्थाका लेखा सुपरिवेक्षण समितिका संयोजक डिल्ली पाठकले लेखा तथा सुपरिवेक्षण प्रतिवेदन र प्रस्तावित कार्यक्रमहरुको प्रतिवेदन प्रस्तुत गर्नु भएको थियो ।