स्वर्णिम चित्रकला प्रतियोगितामा न्यु धादिङ बोर्डिङकी कृतिका दाहाल प्रथम

धादिङ २९ माघ
स्वर्णिम चित्रकला प्रतियोगितामा न्यु धादिङ बोर्डिङका छात्रा कृतिका दाहाल प्रथम भएकी छन् । बुधबार स्वर्णिम धादिङ बहुउद्देश्यीय सहकारी संस्था लिमिटेड नीलकण्ठ नगरपालिका वडा नं ३ ले आयोजना गरेको कक्षा १–५ तहको स्वर्णिम चित्रकला प्रतियोगितामा दाहाल प्रथम भएकी हुन् । यस्तै प्रतियोगितामा रोजमेरी चाइल्ड कियरकी सुमित्रा भट्टराई द्धितीय, धादिङ बोर्डिङकी नन्दिता श्रेष्ठ तृतीय र न्यु धादिङ बोर्डिङका सक्षम शाह सान्त्वना भएका छन् । विजयी विद्यार्थीहरुलाई क्रमश : नगद १ हजार, ८ सय, ६ सय र ४ सय सहित प्रमाणपत्र तथा विजयी विद्यालयहरुलाई कपद्धारा पुरस्कृत गरिएको थियो ।

प्रतियोगितामा नीलकण्ठ नगरपालिका भित्रका २४ वटा विद्यालयका ४७ जना विद्यार्थीहरुको सहभागिता रहेको थियो । स्वर्णिम धादिङ बहुउद्देश्यीय सहकारी संस्था लिमिटेडका अध्यक्ष अशोक कुमार वस्नेतको अध्यक्षता रहेको कार्यक्रममा शिक्षा विकास तथा समन्वय इकाइ धादिङका प्रमुख अम्बिका प्रसाद आचार्यको प्रमुख आतिथ्यता रहेको थियो । कार्यक्रममा विभिन्न विद्यालयका प्रधानाध्यापकहरु, विद्यार्थीहरु लगायतको सहभागिता रहेको थियो ।