धादिङ जिल्लाकै सर्वाधिक राशीको फुटबल प्रतियोगिता धुवाकोटमा माघ १७ बाट

धादिङ १२ माघ
सुमन अधिकारी
२८५६ औं सोनाम ल्होछारको पावन अवसरमा विद्यार्थी उपकार संघ नीलकण्ठ नगरपालिका वडा नं. १४ धुँवाकोटले सर्वाधिक राशीको फुटबल प्रतियोगिताको आयोजना गर्न लागेको छ । तामाङ समुदायको महान् चाड मञ्जुश्री सम्बत २८५६ औं सोनाम ल्होछारको पावन अवसरमा छैटौँ मान बहादुर मेमोरियल कप ७ ए साइड नक आउट फुटबल प्रतियोगिता हुन लागेको हो । धादिङ र नुवाकोट जिल्लामा फुटबल प्रतियोगिताले खेलाडीहरुको बेग्लै पहिचान बनाउ सफल भएको छ । विशेष गरीे ग्रामीण क्षेत्रका खेलाडीहरुलाई प्रतियोगितामा सुवर्ण अवसर प्रदान गर्ने, प्रोत्साहन गर्ने तथा राष्ट्रिय र अन्तराष्ट्रिय खेलहरुमा प्रतिस्पर्धा गर्न सक्षम बनाउने, युवाहरुलाई खेल प्रतियोगिताले थप उर्जा, जोस र जागर प्रदान गर्ने र विविध सांस्कृतिक कार्यक्रम गरी आन्तरिक पर्यटन प्रवद्र्धन गर्ने र भिजिट बर्ष २०२० लाई सफल बनाउने उद्देश्यले तामाङ समुदायको झाँकी समेत प्रस्तुत गरिने विद्यार्थी उपकार संघका सदस्य सूर्य तामाङले बताउनु भयो । फुटबल खेलको विजेता समूहले रु. १ लाख १५ हजार, उप विजेता समूहले रु. ५५ हजार ५ सय र सेमिफाइनालिस्ट टिमलाई रु. १५/१५ हजार नगद, ट्रफी, मेडल र प्रमाणपत्रद्धारा पुरस्कृत गरिनेछ । प्रतियोगिता मिति २०७६ साल माघ १७ देखि २५ गतेसम्म हुने आयोजक संस्थाले जानकारी दिएको छ ।