धादिङ कुष्ठरोग नियन्त्रणको अन्तिम चरणमा

धादिङ ०९ माघ
कुष्ठरोग विरुद्ध हाम्रो अभियान, भेदभावको अन्त्य, मानव अधिकारको सम्मान भन्ने मुलनाराका साथ ६७ औं विश्व कुष्ठरोग दिवसका अवसरमा अन्तक्र्रिया कार्यक्रम बिहिबार धादिङबेसीमा सम्पन्न भएको छ । स्वास्थ्य कार्यालय, धादिङ र नीलकण्ठ नगरपालिका स्वास्थ्य शाखा धादिङको संयुक्त आयोजनामा उक्त कार्यक्रम सम्पन्न भएको हो । कुष्ठरोग बारे जनचेतना जगाउने, समुदायमा लुकी छिपी रहेका नयाँ विरामी पत्ता लगाउने मुख्य उद्देश्यका साथ उक्त कर्याक्रमको आयोजना गरिएको हो । कार्यक्रमका अध्यक्ष समेत रहनु भएका स्वास्थ्य कार्यालय धादिङका वरिष्ठ जनस्वास्थ्य प्रशासक भुवन पौडेलले विश्वमा २ लाख व्यक्तिहरुले कुष्ठरोगको उपचार गरिरहेको बताउनु भयो । कुष्ठ रोगलाई पुर्वजन्मको पापको रुपमा धर्मशास्मा उल्लेख गरेको बताउँदै पौडेलले समयमै औषधी सेवन गरे यो रोग निको हुने बताउनु भयो । नेपालबाट कुष्ठरोग निवारण मात्र होइन उन्मुलन नै गर्नुपर्ने पौडेलको भनाइ रहेको छ ।

धादिङ जिल्लामा कुष्ठरोग नियन्त्रण हुँदै गएको क्षयकुष्ठ अधिकृत तारा शर्मा ज्ञवालीले बताउनु भयो । वागमती प्रदेशमा २ सय ९४ जना कुष्ठरोगबाट प्रभावित विरामीहरु रहेको बताउँदै ज्ञवालीले धादिङ जिल्लामा १५ जना ब्यक्तिहरुलाई कुष्ठरोग देखा परेको जस मध्ये १२ जनाले काठमाडौँबाट र ३ जनाले धादिङबाट औषधी सेवन गरिरहेको बताउनु भयो । तराई लगायत १८ जिल्लामा हाल सम्म पनि कुष्ठरोग निवारण हुन नसकेको अधिकृत ज्ञवालीको भनाई छ ।

कुष्ठ रोग नियन्त्रणका लागि नीलकण्ठ नगरपालिकाले नगरपालिकाका विभिन्न स्थानमा जनचेतनामूलक कार्यक्रम सञ्चालन गर्ने नीलकण्ठ नगरपालिका धादिङका स्वास्थ्य संयोजक बिष्णु रिजालले बताउनु भयो । यस रोगको किटाणु नर्बेका वैज्ञानिक डा. गेरहार्ड हेनरिक आर्मर हेन्सनले सन १८७३ मा पत्ता लगाएका थिए । नेपालमा २०६६ साल माघ ५ गते कुष्ठरोग निवारण भएको घोषणा गरिएको थियो । नेपालमा जम्मा ३ हजार २ सय ८२ जना नयाँ कुष्ठरोगका विरामीहरु रहेकोमा २ हजार ९ सय २१ ज्ना बिरामीहरुले नियमित औषधी सेवन गरिरहेका छन् । स्वास्थ्य कार्यालय धादिङका वरिष्ठ जनस्वास्थ्य प्रशासक भुवन पौडेलको अध्यक्षता रहेको कार्यक्रममा विभिन्न सञ्चार माध्यममा कार्यरत सञ्चारकर्मीहरुको सहभागिता रहेको थियो ।