गंगाजमुना गाउँपालिकाद्धारा उत्कृष्ट विद्यार्थी र विषयगत शिक्षकहरुलाई सम्मान

धादिङ २ असोज

उत्तरी धादिङको गंगाजमुना गाउँपालिकाले राष्ट्रिय शिक्षा दिवस २०८१को अवसरमा गाउँपालिकाको उत्कृष्ट विद्यार्थी र विषयगत शिक्षकलाई सम्मान गरेकोे छ ।

गंगाजमुना गाउँपालिका उपाध्यक्ष रामेश्वर सिंखडाकोे अध्यक्षतामा सम्पन्न भएको उक्त कार्यक्रममा धादिङ जिल्ला समन्वय समिति प्रमुख नवराज अधिकारीको प्रमुख आतिथ्यता रहेको थियो ।

कार्यक्रममा कक्षा ३, ५, ८, १० र १२ मा उत्कृष्ट सिकाइ उपलब्धी प्राप्त गर्ने २४ जना शिक्षकहरुलाई सम्मान गरिएको थियो । त्यसै गरी कक्षा ८ र १० मा उत्कृष्ट अंक ल्याउने ५ जना विद्यार्थीलाई सम्मान गरिएको थियो ।

कार्यक्रममा शिक्षक शिक्षिकाहरुले सांस्कृतिक नृत्य समेत प्रस्तुत गरिएको थियो । कार्यक्रममा शैक्षिक गुणस्तर वृद्धिका लागि छलफल समस्या समाधानका निम्ति विषयगत विज्ञहरु संग अन्तरक्रिया समेत गरिएको थियो ।

गंगाजमुना गाउँपालिकाको प्राङगणमा सम्पन्न भएको कार्यक्रममा वडाका सम्पूर्ण जनप्रतिनिधी तथा गाउँपालिका भित्रका सम्पूर्ण विद्यालयका शिक्षक शिक्षिकाहरुको भव्य सहभागिता रहेको थियो ।