शिवज्योति सहकारीको स्थापना दिवसमा ७३ जनाले गरे रक्तदान

धादिङ २३ कार्तिक
देशैभर भएको रगत अभावलाई कम गर्ने उद्देश्यका साथ शनिबार शिवज्योति महिला बचत तथा ऋण सहकारी संस्था लिमिटेड धादिङले आफ्नो स्थापना दिवसको अवसर पारी रक्तदान कार्यक्रमको आयोजना गरेको छ । नीलकण्ठ नगरपालिका वडा नं. ३ धादिङबेसीस्थित क्याम्पस चोकमा भएको रक्तदान कार्यक्रममा ४२ जना महिला र ३१ जना पुरुष गरी ७३ जना स्वयमसेवी रक्तदाताहरुले रक्तदान गरेका हुन् । संस्थाको १३ औँ स्थापना दिवसको अवसर पारी गरिएको रक्तदान कार्यक्रममा नेपाल रेडक्रस सोसाइटी रक्त संचार सेवा केन्द्र धादिङको प्राविधिक सहयोग रहेको थियो । हाल काठमाडौँ उपत्यका लगायत देशैभर भइरहेको रगत अभावलाई कम गर्न नेपाल रेडक्रस सोसाइटी रक्त सञ्चार केन्द्रको अगुवाइमा जिल्लाका विभिन्न स्थानमा स्थानीय संघ संस्थासँगको सहकार्यमा रक्तदान कार्यक्रम गर्दै आएको स्वयमसेवी रक्तदाता एवं रक्तदान कार्यक्रमका अभियन्ता नारायण कुमार श्रेष्ठले बताउनु भयो ।